The Cabrach Skweel.

The aal school at The Cabrach wiz biggit in the 1870s and it's been empty since the 1970s and lies molderin awa as time lays her weary haan on the aal waasteens in that lonely place o time & past. In that century how many bairns passed through its doors? Fit kind o lives did they hae? I suppose many went tae the far flung reaches o the Empire tae feed its ivver hungry mooth and nae doot rest in that places far awa fae the bonny Cabrach wi its sweet air and her bosies given tae them as a birthright the day they came intae this world. Ithers bade at hame and scraped a gye hard living fae poor poor grun and sleep in her bosies in the aal kirk yard jist ayont the skweel there. Ithers nae doot rest in every country o the world some wi markers tae show their passin yet mair wi nithing tae show they eence lived lost tae colonial wars and fevers that wiped oot so many o them. Plenty though fed the hungry moo o the Great War. Ye only need tae look aroon ye in the Cabrach tae see aa the ruins for the proof o that. Economics played its part of course but war played a much bigger part tae empty this bonny place o folk.
The ghosts o that bairns still play aroon here and if ye stand still for but a minty or twa ye become aware o something jist oot o reach, something nae far awa fae ye yet way beyond mortal touch. The Cabrach's a bonny and welcoming place but tinged wi sadness and lost yesterdays. That maks it one o the maist haunting places I've ever been in.