THE BADGE
School Lane in Macduff is a
gye eerie bit o the aal toon. A lot o fowk hiv seen strange ongyans
there throwe the years an mony’s the story his been tellt aboot
them at the front o a bleazin fire tae keep the shadas o lang syne
fae comin oot o the darkness an touchin the back o a budy’s neck
garrin them loup. If ye dinna believe ma hud ye doon there some dark
winter’s nicht especially if it’s rainin an there’s a stiff
wasterly ween blawin an ye’ll see then fit I mean. This story comes
fae the last war tellt tae me by the woman this happened tae.
Annie sat in front o the fire
ficherin wi an aal ganzey unravelin the oo fae it. She planned tae
use the oo tae knit a balaclava an michtbe a pair o mitts if there
wiz enough oo. It wiz tae be for her man Ackie faa wiz on the Russian
convoys. This wid be the syventh Russian convoy he’d been on. Annie
reflected though on his words last time he’d been hame. He’d been
affa sweert tae gang this time sayin that the shippin companies were
pittin their aalest shippies on the runs hopin the Jerrie U-boats or
coorse weather wid pit them tae the bottom so they could claim the
cost o biggin anither yin fae the government. O the men lost in the
roost buckets they jist didna gie a dam. Siller wiz faar mair
important tae them than the lives o the crewmen. Ackie hid tellt her
angrily that if the shippie ye happened tae be on wiz sunk an somehow
ye survived the very moment ye wint intae the water yer pey stopped
fae the company. He’d added ruefully though that eence in the
waater ye’d faar mair important things tae think aboot than yer pey
bein stoppit. She’d saw but for an instant a look o horror cross
his face at his ain words.
Annie kent weel enough it wiz
bad on this convoys she only needed tae look at Ackie fin he came
hame tae see that. The drawn features and the haunted look in his een
wiz bad enough but there wiz also the scars on his body wi the
freezin conditions and his haans worst o aa jist butchered wi the
freests
that far tae the North. At nearly sixty he wiz faar too aal for the
horrific conditions o the Russian convoys.
Annie saiched at the thocht as
she rowed up the oo intae baas in readiness for wyvin. By the time
she’d feenished rowin the oo she thocht there’d be mair than
enuech for mitts and a balaclava tae send on for him. That’s if he
got them this time? She muttered tae herself. The last parcel she’d
sent teen months tae reach him and even then mair norr
haaf o the stuff hid been missin.
Pittin the oo intae her shewin
pyoke she rose an put the kettle abeen the coals. She’d a wee suppy
sugar left fae her ration so she decided tae hae a tayspeenfae as a
treat. She switched on her wireless tae get the nine o’clock news
as usual but cursed fin she mind it wiz needin a chairge. She’d tak
it tae Wilkinson’s neist day for a recharge. She liked tae listen
tae the news ilka nicht but wi trepidation in her hert because they
sometimes mentioned shippies lost and she always dreaded hearin the
name o Ackie’s shippie the SS Bennachie. Wi an irritated saich at
her ain thochts she put anither wee puckle coal ontae the fire tae
garr the kettle bile.
She could feel the caal drucht
comin in throwe the attic windae at her as the punchin wasterly
weens came in aff the Moray Firth. Annie checkit the blackout blinds
hidna come unshipped allowin licht tae peek oot. That thocht brocht
her richt back tae Ackie eence mair. Fit kind o seas wiz he facin in
a blacked oot shippy crashin its wye throwe the freezin caal ice
strewn waters at the tap o the warld? As if tae mock her thochts she
heard heavy rain lashin against her rattlin attic windae an
shuddered.
Aifter she’d heen her cuppy
o tay wi the guilty speenfae o sugar Annie dampit doon the fire and
turned aff the gas licht fin a knock sounded on the street door.
Annie grimaced speirin the empty room “Faa could this be at this
time o nicht?” She
lookit at the clock on the waa and saw it wiz a quarter past nine.
Lichtin the wee
paraffin lampy Annie made her wye doon the creaky rotten stairs. The
chappin got mair insistent and Annie takin care on the dark stairs
shouted “I’m comin, I’m comin!” The stairs were in a really
poor state as this hid eence been a wee warehouse for huddin fishin
gear an riggin. She bade in fit hid eence been the owner’s hoosie
abeen the warehouse but it like the stair wiz the waar o the weer.
Orr the time she reached the
length o the door the knockin wiz getting affa insistent so angry
kind she shouted “Aaricht, aaricht hud yer horses!” She fichered
wi the big aal bolt ahin the street door and as it slid back the door
blew open allooin the ween an rain tae wun in. “Oh Michty be here!”
cried she fin she saw Ackie staanin there soakin o weet. She wiz awa
tae say mair but a stronger gust o ween blew the lampy oot leavin
them in pick-mirk. She dimly saw him walk past her. Strugglin sair
she pushed tee the door taakin aa her strength anent the ween an
rain. Surprised that Ackie hidna helped her she made her wye cannily
up the dark eerie stairs taakin care nae tae staan on the rotten
bitties. By the time she wun intae the hoose Ackie wiz sittin on his
ain cheer at the chick o the fire. Oh me he wiz soakin o weet so she
quickly relichted the gas lamp an rummled up the coals an put the
kettle on the fire. Aa the while speirin at him faan he’d gotten
hame? He nivver said a wird but jist sat there lookin up at her wi a
confused look ontae his white drawn face. “Michty ye’ll hiv tae
get that weet clyse aff or ye’ll taak yer death o caal!” So sayin
she wun throwe the hoose tae get a chynge o clyse for him. She came
back a minty later wi clyse an a tool for tae dry himsel wi but fin
she wun back he wisna there. Shoutin his name she searched the hoose
but nae signs o him did she find ava. Thinkin that he’d maybe wint
oot the backie tae
the lavy she
lichted her lampy and made her wye oot tae the heed o the stairs.
Richt awa she felt the ween blawin up at her and heard the street
door bangin back an forritt wi the ween.
Orr the time Annie got tae the
street door she could jist maak oot Ackie turnin doon the wye o the
hairbour so she ran ahin him shoutin oot his name but her words were
lost in the ween an drivin rain- - - - but nae one sign o him could
she see. Aifter a fair fylie searchin aboot she made
her wye hame in a state o collapse thinkin aa the while she’d
imagined the whole thing.
Dryin herself aff in front o
the fire wi anxious thochts rinnin throwe her mind she lookit ower at
Ackie’s seat as if expectin tae see him sittin there. That’s fin
she saw something glintin on the airm o the cheer. Gan ower she saw
richt awa it wiz his wee Merchant Navy lapel badge that he always
wore wi sic pride. Pickin it up Annie wiz overwhelmed wi the deepest
despair she’d ivver felt in her life and wint tae her knees pressin
the wee badge tae her breest an graat like a bairn.
A couple o wikks aifter
that nicht a letter
arrived fae Ackie’s company tellin her that the SS Bennachie hid
been sunk on the twinty fifth o December 1943 aside the Klola Inlet and
there’d been nae survivours. Tearfully
Annie realised that wiz
the date he’d been at the hoose. The company also enclosed a money
order for pey earned and unbelievingly she saw his pey hid stoppit at
a quarter past nine on the twinty fifth o December. Probably
the very meenit he’d hit the freezin waater?
copyright © Patrick
Hutchison
---------------------------------------------------------
No comments:
Post a Comment